DÖKÜL NEJÖNIK
Back ] Up ] Next ]

 

Fa Hans . Christian. Andersen

In läned valikos äbinos lejönik; äbinos hitüp!

Gren äbinon yelovik e vaen äbinon grünik; sigayeb ästanon kumo in yebaläns grünik, ed us stork ko futs lunik e rediks oka äspatom ed äpükom Lägüptänapüko, bi püki at ilärnom dub mot okik. Fots gretik ästanons zü fels e yebaläns, e laks dibik äbinons zänodü fots; jenöfo - in läned äbinos lejönik!

In sviet sola äseaton ledom bäldik, pezüöl me kanädils, e se mön ledoma e jü vat lukebs gretik äglofons; ats älabons bledis, kels äbinons so geiliks, das cilils äkanons stanön dis gretiküns; is äbinos kofudik äs in fot gretikün. Is jidök eseatof su näst oka, esötof lekuvön nögis oka, ab nu äbinof fenik, bi ädulos so luno, e bi no suvo jidök votik ävisitof ofi; jidöks votik äbuofs svimön in kanädils, ka seadön dis lukebabled, ad spikotön ko of.

Fino nögs äkräkons: "Pip! pip! " äsagons; yeloks valik ivedons lifiks e kaps valik äpubons.

"Rap! rap! " äsagof, e täno äspidons ed älogons valöpo dis bleds grünik, e mot onas ädälof, das älogons, bi grün binon gudik pro logs.

"O! vol binon so gretik!" döküls valik äsagons; bi vo nu älabons spadi gretikum, ka ven äseatons in nög.

"Kredols-li, das at binon vol lölik ?" mot esagof, "gololsöd etaflanü gad ini fels predikana, ab us neai ebinob! - binols-li is valikans?" e täno äsustanof: "No, labob no valikis! nög gretikün seaton nog us; kiüp binon pefinöl! nu suno binob fenik!" e poso dönu äseadof.

"Benö! lio stadol?" esäkof jidök bäldik, kel ekömof ad visitön ofi.

"Dulos so luno ko nög at!" esagof jidök, kel eseadof; hog no okömon in at! ab nu, logolös votikis; binons dökils lejönikün, kelis elogob! valiks leigons fati okas, stupani at! no okömom ad visitön obi.

"Leadolös, das logob nögi et, kel no okräkon!" jibäldikan äsagof, "ologol, das binon gananög! so i pecütob vöno. Leadolös, das logob nögi! - lesiö! at binon gananög gretik! Leadolös blibön at e tidolös cilis votik ad svimön!"

"Ye eseadob luno su at!" jidök äsagof; "oseadob nog lunikumo su nög".

"Glidö!" jidök bäldik äsagof, e täno ämogolof.

Fino nög gretik ekräkon. "Pip! pip!" esagon nimil ed epubon; äbinon so gretik e so nejönik. Jidök älogedof omi: "Binol vo dökil legretik!" äsagof; "nek dökülas votik leigon oli! Binol-li ganül seimik!"

Odelo äbinos stom legudik e lejönik; sol änidon su lukebs grünik valik. Mot dökülas ko famül lölik oka ägolof lü kanädil: Klatj! äbunof ini vat: "Rap! rap! " äsagof e döküls id äbunons ini vat; vat äkömon love kaps onas, ab ägekömons sunädo ed äsvimons so gudiko; futs ägolons gudiko e döküls valik äbinons in vat, igo dökül nejönik e gedik id äsvimom.

"Binom nejönik !" mot äsagof; "ab gebom futis oma gudiko; binom dökül lönik oba ! veräto binom ze jönik, ven logedon ati ! rap! rap! - kömolsös nu ko ob, ed odugob olis ini vol, ed ini dökayad, ab blibolsös nilü ob, das nek ostepon su ols, e küpälolsös demü kat !"

E täno äkömons ini dökayad. Äbinos noid lejekik us, bi äbinons famüls tel, kels äzanons demü fitakap, e poso ye kat ägetom ati.

"Logolsös, so stados in vol !" mot dökülas äsagof ed ätovon tipamudi oka, bi of id ävipof labön fitakapi. "Gebolsös nu futis !" äsagof, "spidö! e glidolsös jidöki bäldik usik ! binof veütikünan atas valik is; labof bludi Spanyänik, kludo binof gretik, e logols, das labof luklöfi redik zü fut; binos vemo jönik e sik gretikün, keli dök seimik okanof getön; atos binos so vemo, das no vilof nelabön ofi !

Spidö! - Rap! "

Ed äspidons; ab döks votik logedons onis ed äsagons kleiliko: Benö ! nu ogetobs i dökülis at; binobs ya tu mödiks, e ye -; e fi, dökül et binom so nejönik, no osufobs omi ! - e sunädo dök seimik äspidom ad beitön omi in näp.

"No beitolös omi !" mot äsagof, "nofom neki !"

"Lesi, ab binom tu gretik e drolik !" äsagom dök, kel ibeitom omi, "e kludo oflapobs omi !"

"Cils olik binons jöniks !" äsagof jidök bäldik ko luklöf redik zü fut: "valiks binons jöniks plä at - no binom jönik ! ävipoböv, das okanol dönumekön omi !"

"Atosi no kanob, o vom benik !" mot dökülas äsagof, "no binom jönik, ab binom nim legudikün e svimom so gudiko - gudikumo ka votiks; niludob, das ovedom jönik, ven obinom bäldikum, u das lätikumo ovedom smalikum ! Eseatom tu luno in nög, e kludo no egetom fomi verätik !" e tàno äplökof omi in näp ed äsmufof bödaplümis oma: "E zu binom hidökül" äsagof, "kludo no binos so veütik ! Kredob, das ovedom nämik, ed atos oyufos omi !"

"Döküls votik binons nämiks !" jibäldikan äsagof; "nu at binon lom olsik, plidolsös ! ed if otuvols fitakapi seimik, blinolsös obe ati !"

Nu äbinons in lom. Ab dökül miserabik, kel latiküno ikömom de nög, e kel äbinom so nejönik, päbeitom e päfopom ä fa döks, ä fa goks. "Binom tu gretik !" valikans äsagons. Dökül miserabik äbinom so dofik, bi äbinon so nejönik e bi päfopom fa nims valik dökayada.

So ästados in del balid, e poso ävedos ai badikumo. Dökül miserabik päyagom fa valikans, igo gem oma äbinom so badik, bi igo äsagom: "Vipobs, das kat äsumomöv oli, stupan nejönik !" e mot äsagof igo: "Vipob, das äbinolöv in höl !" e döks äbeitons omi, goks äflapoms omi, e jidünan, kel äblinof nimes fidi, äjokof omi ko fut.

Poso ärönom ed äflitom love buid; bödils pejeköl in fots äflitons ini lut. "Binos, bi binob so nejönik !" dökül äniludom ed äfärmükom logis oka, ab ärönom ye föfio, täno äkömom in lulak, kiöp döks sovadik älödons. Is äseatom dü neit lölik, bi äbinom so fenik e so glumik.

Gödo döks sovadik äflitons ini lut, ed älogedons kompenani nulik: "Kim binol?" äsäkons, e dökül äflekom oki ed äglidom omis äs gudiko äs äkanom.

"Binol vemo hetabik e nejönik !" döks sovadik äsagons, ab binos neveütik, if te no omatükom eki in famül obsik !" Miserabik! no älabom tiki at; matikön; te ädalom seatön bevü jugs e drinön lulakavati nemödik.

Us äseatom dü dels tel, täno gans sovadik tel äkömons; bü brefüp äkömoms de nög, e kludo äbinoms so pleidäliks.

"Lilolös, o kompenan !" äsagons: "Binol so nejönik, das löfobs oli vemo ! Vilol-li flitön ko obs e vedön böd votöpik ?" "Nilü is in lulak votik jigans sovadik binofs, kels binofs so svidiks e so jöniks, e valiks kanofs sagön: <Rap !> Ba kanol binön läbik us, bi binol so nejönik !

< Pif ! paf !> ätonos poso, e gans bofik äfaloms in jogs, e vat ävedon redik äs blud, bi gans äbinoms nelifiks nu; < pif ! paf !> ätonos dönu, e kums gretik ganas äflitons se jogs, e poso äjutoy dönu. Yag gretik äjenon; yagans äseat- oms valöpo zü lulak, ans ibo äseatoms su bimaletuigs, kels ätenikons love jogs; smok blövik äfulükon züamöpi; in släm yagadogs äkömons; <klatj ! klatj !> jogs e rids ävebons valöpo; äbinos lejek pro dökül miserabik; äflekom kapi oka ad getön oti dis flitäm, e nilü om dog legretik ästanon; lineg älagon se mud omik, e logs älulitons lejekiko; äpladon lumudi oka fo dökül - äjonon döküle tutis japik - e <plask !> ägegolon nen sumön döküli.

"O, Gode dani !" dökül äseifom, "binob so nejönik, das ibo dog no mögon beitön obi !"

E poso, äseatom lestiliko du glöbs äflitons da jogs, e du jüt äton- ons ai. Poszedelo äbinos stilik, ab nimil miserabik no ädalon sustanön; ästeb- edom nog düpis mödikum, täno äspidom ad rönön se lulak ed ärönom love fels e yebaläns; ävienos, sodas äbinos fikulik pro om ad föfiokömön.

Ün soar älükömom lü ludomi pöfik e smalik; dökül äbinon so miserabik, das no änolom, va äfalomöv atflanio u etflanio, e kludo no äfalom. Ävienos so, das dökül ämütom pladön oki su göb ad no falön; e vien ävedon badikum. Täno älogom dökili; id älogom, das yan pilivon se fleged ed älagon so slobiko, das äkanom kömön ini cemil da slit, e so edunom osi.

Is motil bäldik älödof ko kat e jigok okiks; e kat äkanon gobadön bäki e spagön, ven röbon heris ona; jigok älabof futis smalik e brefiks: änögof, e motil älöfof ofi äs cili oka.

Ün göd gölik süpo älogoy döküli foginik, e kat äprimom ad gobadön bäki e jigok äluvokof. Kisi ? ..." motil äsagof ed äzilogof, ab no älogof gudiko, e kludo äniludof, das dökül gretik äbinom dök pinädik, keli ipölagolom.

"Binos vo fan gudik !" äsagof, "nu okanobs getön dökanögis, if no binom hidök ! o, blufobs."

E poso dökül päblufom ünü vigs kil, ab no änögom. E kat äbinom mastan in dom e jigok äbinof jimastan, ed äsagons ai: "Obs e vol !" bi äniludons, das äbinon lafadil e lafadil gudikün. Dökül äniludom, das ädaloy labön niludi votik, ab atosi jigok no äsufof.

"Kanol - li nögön ?" äsäkof.

"No !"

"Benö ! takedolös kludo !"

E kat äsagom: "Kanol - li gobadön bäki e spagön ? "

"No !"

"Benö ! kludo no mutol labön niludi, ven siämöfans spikons !"

E dökül äseadom in cemagul ed äbinom vemo glumik; täno ämemom luti flifik e lunidi sola; älevipom vemo svimön su vat, ed atosi äsagom jigoke.

"Binol - li fopik ?" äsäkof. "Dunol nosi, kludo egetol vimis ! Nögolös u spagolös, e täno vims at onepubons."

"Lesi ! ab svimön su vat binos so plitik !" dökül äsagom, "getön vati love kap e binön dis vat i binos so plitik !"

"Binos - li blesir so gretik !" jigok äsagof, "binol fopik ! Säkolös kati, binom visedikün, keli sevob; no löfom ad svimön su vat u binön dis vat ! ed ob ? - Kanol igo säkön jimastani obsik, vomi bäldik; nek in vol lölik binon visedikum, ka of ! Niludol - li, das löfof svimön u binön dis vat - "

"No kanols suemön obi !" dökül äsagom.

"If obs no kanobs suemön oli, nek okanon suemön oli ! Niludol - li, das

binol visedikum ka kat e vom, e ka ob - ! No simulolös oli, o flen obik ! e danolös Godi ola pro valikos, kelosi edunoy pro ol ! Binol in cemil vamik e labol sogi, de kel okanol lärnön, ab binol luspikan, e no binos plitik kosädön ko ol ! Kanol kredön obi ! Vipob ole valikosi, kel binos gudik, sagob ole dinis, kelis no nedol demön, ab dub atos sevoy flenis oka ! nu nögolös e lärnolös ad spagön !"

"Kredob, das omotevob in vol gretik !" dökül äsagom.

"Benö ! dunolös so !" jigok äsagof.

E poso, dökül ämogolom, äsvimom su vat, äbinom dis vat, ab nims valik älogedons omi ko naud demü nejön omik.

Nu fluküp äprimon, bleds bimas in fot ävedons yelovik e bloniks; vien ämosumon onis so, das äfalons sui glun, e lut äbinon so koldik e dagik; lefogs ninädons gräli e nifi, e su buid ästanom rab, <ra ! ra!> luvoköl demü kold; "kanos flodön vemo," ätikom: dökül miserabik no ästadom gudiko !

Ün soar seimik, sol ämodonikon so jöniko, kum bödas gretik e lejönik äkömon se fotil, dökül neai ilogom bödis so jönikis; äbinons levietiks ed älabons särvigis lunik e blegikis; äbinons svans; ämekons tonodi nekösömik, e se- tenons flitämis lejönik e lunikis okas ed ämoflitons de läns koldik lü läns vamikum; äflitons so geiliko, das dökül nejönik ti ävedom glötik; äflekon oki in vat, ätenom särvigi oka ed ämekom tonodi so dudranöli e bisariki, das ävedom dredik. O, no äkanom glömön bödis at, bödis läbik at, e ven no plu äkanom logön onis, äsvimom dis vat, e ven ägekömom sui sürfat, äbinom vemo kofudik.

No äsevom nemi bödas at, no änolom, kiöpio äflitons, ab ye älöfom onis plu ka eki in vol; äbinom leno glötik, no ävipom oke jöni somik, äbinomöv gälik, if döks isufons omi bevü oks: - o, nim miserabik e nejönik ! E nifüp ävedon so koldik, so koldik ! dökül ämutom svimön mo e ge in vat ad neletön flodami vata; ab in neit alik ävedon hog, in kel äsvimom, smalikum e smalikum; äflodos so, das gladaplen ädredom; dökül ämütom igo mufön futis, dat glad no ätegonöv hogi; läto ävedom fenik, äseatom lestiliko ed äflodom in glad.

Ün göd feilan äkömom, älogom omi, ägolom su glad ed ädäbrekom oti ed äpolom döküli lü dom ad legivön omi jimatane oka. Us ävedom lifik dönu.

Cils feilana ävipons pledön ko om, ab dökül äniludom, das ädesinons lezunön omi, ed äflitom, in jek oka, in miligatub, so das milig äfalon sui glun; vom äluvokof ed äflapof namis oka kobo, e täno dökül äflitom sui tub, in kel milig äbinon, e poso ini meilatub e se at ini cem - - - ! Vom äluvokof ed äflapof omi ko staf, e cils ärönons ad fanön döküli, ed äsmilons ed äluvokons; äbinos gudik, das yan äbinon maifik; ärönom se cem ini nif, kel ikömon bü tim brefik, - ed us äseatom äsif in leslip.

Ab ävedosöv tu lügik ad konön dö miserab lölik ut, keli äsufom in nifüp lunik - äseatom in lulak bevü rids, ven sol dönu äprimon ad nidön vamiko, lauds äkanitons - äbinos florüp lejönik.

Süpo ätovom flitämis oka - äbinons gretikums ka büo; ämoflitom ed äkömom suno ini gad gretik, kiöp podabims älabons floris jönik, kiöp florabets äsmelons so beno ed in gad äbinons kanads flekik. O ! is äbinos so löfidik, so flekik ! e - se fotil äkömons svans kil, lejöniks e vietiks; äsvimons so nefikuliko su vat. Dökül äsevom nimis lejönik ed ävedom so glumik.

"Oflitob lü ons, o böds regik ! ed odeidons obi, bi dalob nilikön lü ons, do binob so nejönik ! ab binos neveütik ! binos gudikum padeidön fa ons, ka pabeitön fa döks, paflapön fa goks e pajokön ko fut fa jidünan ! " ed äflitom in vat ed äsvimom lü svans lejönik, kels älogons omi ed äsvimons kol om.

"Deidolsös obi !" nim miserabik äsagom ed äblegom kapi oka kol vataplen ed ästebedom deidi, - ab kisi älogom in vat klilik ? Älogom dis ok fläki oka, ab no äbinom böd blägagedik e nejönik, äbinom it svan. Binos neveütik, va binon se dökabid, ven eseaton in svananög !

Äbinom vemo gälik demü miserab ut, keli iliedom; nu älesevom veratiko läbi oka. E svans gretik äsvimons zi om ed äglidons omi.

Ini gad äkömons cilils anik, äjedons bodi e grenis in vat, e cil smalikün äsagon :-

"Svan nulik seimik ekömom !" e cils votik id äsagons: "Lesi ! svan nulik seimik ekömom !" ed äflapons ko nams ed ädanüdons demü gäl, e täno ärönons lü fat e mot okas, ed äjedons dönu bodi e kekis in vat, e valikans äsagons: "Svan nulik binom jönikün ! binom so yunik e so jönik !" E svans votik äglidons omi.

Äsenom senis seledik ed ästegom kapi dis flitäm oka, no äsevom kikodo; äbinom tu läbik, ab ye leno pleidälik, bi lad gudik neai vedon pleidälik; ämemom pöjutami e kofi ut, keli isufom, e nu älilom, das valikans äsagons, das äbinom jönikün bödas jönik valik. Äjinos, das flors valik äglidons omi, e sol änidon so vamiko e so gudiko, e täno flitäms oma ämufons okis, särvig lunik ätovon oki, e ladöfiko äyubom: "Dö läb so mödik no ädrimob, ven äbinob dökül nejönik ! "

FIN