Reided 5
Back ] Up ] Next ]

 

 

V:38:95

SIMON VON GELDERN

In memapenäds de <Heinrich Heine> tuvoy dönuamo mäniotis dö leziom bü lunüp ideadöl, penemöl: <Simon von Geldern>, tefü kel ililom ün yunüp okik dinis bisarikün.

Konots, kelis ikanom lilön lomo dö om, ikodons magädi so dibätiki pö om, das iblibons dü lif lölik omik in mem oma.

Ventürs de <Simon von Geldern> vo ebinons bo plödakösömiks, ifi lecedoyöv äsä konädis alutosi, kelosi zians bäldik äsevofs ad konön dö om.

Änemoy omi eli <Chevalier> u <lofüdänani>, bi idunom tävis gretik in lofüdän, ed ädajonom oki pos geköm okik in klotamamod lofüdänik.

Pos pilgrim lü <Hierusalem>, kö älabom su bel: <Maria> in plekastäat visioni, pädavälom ad jäig fa beduinatribüt in Nolüda-Frikop, ud - äsä <Heine> notodom läs dalestimiko - ävedom ravanacif ä jeikan karovas.

Äbinom monitan süperik, e dub maged geilik lunedik okik, dub burnud nekäliko pizüüköl e dub kap nobiko pilöüköl, puban magädabik. Älabom repüti, das älabom tälenülis koultik. Dü tim semik ästebom pö kurs Yuropik difik.

Valemiko ätirädom küpäli lü ok, ed äsüükom demädi sekü voal foginik klänöfik, kel ädabinon tefü pösod omik.

Ma sagäds elabom-la bo pö bal kuras lelöfaventüri ko ledaut jenöfik. Ventür et -

so äsagoy - ikodon tio deadi omik; te dub monitav bluföfik okik, ikanom savön oki.

Fino ireafom ini Linglän, ed älifädom us dabini vemo lügiki.

<Heine> penom in memapenäds okik: <Leziom at emagädom plödakösömiko ad magäl obik. Val, keli äkonoy obe tefü om, äkodon magädi nekvänovik in ladäl yunik obik: äjäfälikob so vemo ko konot tevas e fätotas oma, das ömna ün del fulik senäl flodöfik äsüikon pö ob, ed äjinos lü ob, das ob it äbinob-la leziom edeadöl et, e das lif obik äbinon-la te fov lifa oma, kel ideadom bü lunüp! Neito gelogam ot äjenon in drims obik ... Stad bisarik at ädulon bo du yel lölik bal, e do sevälöf obik ivedon dönu lölöfiko kösömik, ga retods klänik ona äposbinons in lan obik. Klieni bisarik ömik, kesenäli e tasenäli mifätikis ömikis, kels leno lönedons lü binäl rigik obik, si! igo duni ömik, kel taöfon ta meug obik kodidob posvobede se drimatim et, ün kel äbinob leziom lönik obik>.

Vestig jenavik nespalik no eretükon, liedö! mödiki de dabinan romatik nidik, keli el <Heinrich Heine> älecedom,. pö magäd sekü konots se yunüp okik, leziomi okik. Ab man et ädigädom küpäli patik, bi in poedots ela <Heine> flun klänik de <Simon von Geldern> binon kleiliko sienovik, e mödiks lidas omik, dub köl e ton onas, memükons tefü drimavol cilüpa omik.

Fa <H.A.L.> yela l952.

- - - - - - - - - - - - - - - - - - - - -oOo- - - - - - - - - - - - - - - - - - - - -